close

Anmelden

Neues Passwort anfordern?

Anmeldung mit OpenID

D`Schnorä voll Dä Schneeblitz - Hilariverein Laufen

EinbettenHerunterladen
D’Schnorä voll
Äs isch passiert am letschtä Hilari
do hät dä Alain Bieler i sim Balari
wellä falschi Zäh ie chläbä
und hät dän leider müessä erläbä
das mä söttig gföhrlichi Sachä
äntweder nüechtern oder vomä Profi söt lo machä
är nimmt die Biesser, beschmierts ganz fescht
mit Kukident Haftcreme extrafescht
schoppät die Zäh id Schnorä ieä
und loht das ganze äs bitzeli zieä
probiert dän langsam mol s’Muul ufmachä
doch do vergoht im dän äs lachä
bringt d’Schnorä plötzlich nümmä usänand
alläs verchläbät s’isch allerhand
dä chläbät wie blöd dä super Kitt
a Ortä wo dä Alain meint die gits gar nid
äs Zahfleisch chläbät a dä Lippä
Fädä ziets bis zu dä Rippä
und s’schlimschte drah ihr würdet gsäh
s’einzig wo nid hebät am Schluss sind di neuä Zäh.
Dä Schneeblitz
Äs schnäielät äs bäielät äs goht än chüelä Wind
dä Chrigel Räss rüert dä Schneepflueg ah und dä Kärndli frürt an Grind.
Doch zwüschät all däm Schneegetümmel
fahrt dä Muurer Ruedi dä cheibä Lümmel
mit sim neuä Traktor do gsehsch in flitzä
als wür im dä Tüüfel im Nackä sitzä
wie gschtört fahrt är dur d‘Uhwieser Gassä
mä chönt meinä är wür irgendwo öppis verpassä.
Schiessdräck
Wännt Du mol gohsch go um dä Weier spazierä
dän chas guet sie das Dir tuet passierä
du schtosch usverseh uf dim Sunntigsgwaggel
inän Schiesdräck ie vo somänä Taggel
uf dä Withfeldstross richtig Anderbach zuä
do schiessäd die Kööter jo alläs zuä.
Und chunsch dän richtig Weiergass
vergoht dir äntgültig din Wanderspass
di ganzi Stross isch vollä Gaggel
nur damohl nid vom Hundetaggel
vom Muurer bis ad Landstross uä
schiessäd d’Rössli alläs zuä.
Mir isch scho klahr das d’Rieterslüüt
noch fürä luegäd und hinnä gsends nüt
doch fahräd alli die fulä Lüüt
nochäm Rietä döt durä und gsend immer no nüt
anstatt mol usschtiegä us sim Bonzächarä
tüends lieber über iren Mischt iefahrä
oder bliebäd lieber uf irem Güggel sitzä
bim wüschä chömtätd jo susch no is schwitzä
do muesch di nid wunderä gits so BÖÖSI Gsellä
wo mir letschti händ wellä än BÖÖSÄ Witz verzellä
Frage: „Wo hat das Pferd sein Arschloch???“ Antwort: „Auf dem Rücken“
Vo Planig wänig Ahnig
Im September isch z’Dachsä äs Härbschtfäscht gsieh
leider ischäs amäl au schnäll wider vorbie
viel Arbät gits und alli müend chrampfä
zum so äs Fäscht zum Bodä us stampfä.
Au dä Wyybauverein ziets is Dachsemerland
si machäd döt unnä dä Uhwieser Stand
än schöönä Platz händs übercho
döt söt dä prächtig Stand dän stoh.
Voll Hektik fangäd sie ah bauä
erschti Nägel inä hauä
dä Bodä stoht jetzt scho bereit
jetzt nur no churtz, gschwind überleit,
chli mässä, zirklä umästossä
susch goht dän s’Schürtor nümm uf da grosse.
So jetzt stimmts, dä Bodä passt
jetzt sofort d’Wänd drahärä g’jasst
als verschruubä, nivilierä
dä Teckel druf, s’cha nüt me passierä,
jetzt nur no im Hüüsli alläs versorgä
dän chas dän cho das Fäschtli am Morgä.
Einä rüeft „gang dä Chüelschrank go holä“
und plötzlich g’hörsch du alli johlä
äs Schüürtor isch uf eimohl blockiert
die Winzer luegäd alli schockiert,
die Kärli händ vor luuter mässä
glatt äs Vortach no vergässä
das stoht än meter drüber us
so brigäts dä Chüelschrank nümm zum Schüürtor us,
vor luuter mässä und zirklä vo däm Bodä däm schräägä
müend si dä Chüelschrank jetzt ums ganzi Huus umäträgä.
Nez RUUUSCH
Im Dorfteil Nohl do gits juhee
än jungä Mah däm isch öppis gscheh,
Mändli heisst är wie chönts andersch sie
und das Gschichtli isch wie folgt öppä gsieh.
Dä Peter hät uf Basel müessä
a nä Mäss go sini Chundä begrüessä
so ä Mäss cha ziemlich ahsträngend sie
drum törfs bi Fyrobig au mol äs Bierli sie.
Nur hät ärs dän chli übertriebä
am Schluss sinds Sächs gsie oder Siebä (sind sicher nomeh gsie, aber da reimt so schön)
är hät plötzlich än Ruusch, ä riesä Fitzä
cha nümmä stoh wot nur no sitzä
äs Schnäpsli no, git im dä Räscht
jetzt wot är numäno is Näscht.
Im Hotel suecht är dän sis Zimmer
mit sim Ruusch würts immer schlimmer,
was är dän döt i sälrä Nacht
i däm Hotel innä würklich hät gmacht
das chönd mir do nid gnäuer prichtä
müestäd öppis zämädichtä.
Uf allfäll so hät mäs üs klagt
händs in im Hotel zum Teufel gjagt
jetzt stoht är do und wot go Pfuusä
ganz älei in Basel im Rägä ussä,
är dänkt sich blosäd mir in d’Schuä
ich wot jetzt äntlich mini Ruä
hockt is Taxi seit jetzt heb di
weisch wos Nohl isch, du cheibä Beppi
mä seit für das Gäld wo das Taxi heb koschtät
het är gschieder grad äs ganzi Hotel poschtät.
Brot für Brüder
Dä Rubli Ralph ihr känned in alli
macht gärn öppä halligalli,
Hilari und Fasnacht da isch sini Ziet
do ischs mit schaffä nümmä wiet,
do nimmt är meischtens immer frei
isch immer „On Tour“, isch sältä dihei.
Doch au am Geburi loht är sich nid lummpä
stämmt im Uusgang gar mängä Hummpä,
bis är rundi Schuä ahät
so wot är dän mol äntlich is Bett.
Doch liet sini Heimät jo oh Schreck
z’Dachsä unnä grad näbet äm Beck.
Äs tagät scho und d’Nacht isch durä
mä gseht dä Rubli id Bachstubä surä
är seit zum Beck „hei Miegeli,
schalt dini Maschinä nomohl ieh.
Ich bschtell jetzt grad mol Brot das hät,
und nochhär gang ich dän grad is Bett“.
Dä Emil seit „hei schpinsch min Sohn,
du bisch mir scho än schöönä Gloon,
wa wotsch mit siebä Kilo Wiessbrot machä?
do vergoht sogar dir äs Lachä“
Dä Rubli seit „los Beck, ich tue da bschtellä,
ha scho immer mol gnueg Brot im Huus wellä“.
Am Tag dän wo är uf isch gwachät
hät sin Schatz dän nümmä glachät
die gheit vor Schreck grad us dä Sockä
uf so viel Brot do bliebsch doch hockä,
bim Katerfrüeschtück do heb mä in dän gsäh
kilowies Nutellabrot zue sich näh.
Hoch hinaus
Dä Förschter Felix tuets nid grad beglückä
är mues in Bänkä dä gross Chrischtbaum go schmückä,
dä Chef tuet im und sinä Gsellä
für das ä Hebebühnä anästellä.
Är stoht in Chorb und loht sich ufä
sisch nid sis Ding du ghörsch in schnufä,
är wot dän wider abä cho
doch bliebt das Ding döt obä stoh.
Kein Wank me macht dä cheibä Charä
äs isch fascht zum zur Huut usfahrä,
du ghörsch in fluechä, schimpfä und johlä
„tüend mi wider abä holä“.
Vo döt ah ischs wider wie eh und je
und sie tüend wider d’Leiterä zum schmückä neh.
Weg ist Weg(g)
Dä Lanz im Grüt sisch würklich so
dä hät im Härbscht dä Pflueg fürägnoh,
hät Zackägfahrä i sim Land
und nid mol gmerkt s’isch allerhand,
das är vor luuter umä ruechä
am schluss än Fäldwäg mues go suechä,
ä ganzi Stross eifach underä gfahrä
im Strossächef do chunnt fascht äs Plahrä,
da isch halt dä Nochteil vo dänä Riesä Traktorä
die tüend au wänns richtig härt würt, eifach wieter rohrä.
Vögelififf
Dä Bieler Andi tänkt sich nüt
är hockät gärn chli bi dä Lüüt,
sit neuschtem ghört är au wider guet
sit im äs Hörgrät hälfä tuet,
nur hät das Grät halt sini Tückä
was dä Bieler nid grad tuet entzückä.
Wännt Du im Andi z’nöch tuesch cho
dän bliebt im mängmol s’Härz fascht stoh.
Si kopplät z’rugg die Ghörprotesä
„die Pfieft nu no, die cheibä Scheesä“.
Wend Ihr au mol losä wie luut das tuet pfieffä?
Dän müend Ihr nur mol am Bieler as Ohr anä grieffä.
A Ruä is
Do sind doch üsi WG Trabandä
mol wider ziemlich tüüf is Fättnäpfli gschtandä,
jetzt händ doch die Sürmel zmitz i dä Nacht
Ragetä abloh das tätscht und kracht.
Dä Hess dä hauts fascht us dä sockä
äs ganzi Dorf isch do verschrockä,
Polizei isch cho mit viel geklierr
dä Gmeindroht seit „jo spinnäd Ihr,
so goht das nid, so goht das nie,
susch tüend mir Eu dä Schtecker zie.
susch isch dän aber Schluss mit Spass,
und dän isch ruä i dä Schnidergass“!
Und übrigens händ Ihr scho gwüsst???
Das näbet dä neui Salzsilo bim Werkgebäude
no än Grossä Tequillatank anächunnt und än Zitronäspender.
Dänn chasch noch am Entsorgä no äs paar Klöpfti hinder d’Bindä
kippä.
_____________________________________________________________
Das dä Hilariverein Flurlingä bi dä Metztg Fleisch bschtellt
hät,
und uf dä Chischtä vom Nidermaa dän gschtandä isch:
„z.H. HIKALIVEREIN“
Und das d’Mondliger jetzt säged mir segäd Anahlfhabeetä
______________________________________________________________
___
Das dä Reto Keller zwor än mittelmässigä Sackgummper isch
aber vo Auto kei Ahnig hät.
Susch würd är dä Elian irem Auto nid Benzin anstatt Diesel
gäh.
______________________________________________________________
___
Dä Wendel Hans so ä Schwöscher isch, das är sogar i dä
Skischue än Elektrischi Heizig hät.
______________________________________________________________
___
Das Ihr s’Altiesä au chönd bim Sheriffi im Rütibuck chönd
anärüerä.
______________________________________________________________
___
Das bim Bau vo dä erschlüüsig Hofacher dä Tierschutz sis Veto
iegreicht hät. Äs vertröchnid schienz z’viel Schnäggä
a dä Schufläschtiel vo dä Bauarbeiter.
______________________________________________________________
___
Das ihr A dä Schuelstross än rotä Occasions Chranä chönnt
chauffä
______________________________________________________________
___
Das Dä Hölmli alläs isst wat Moni chochät. Au s’Fueter für
d‘Vögel
Fischeri zum erschtä
Sisch gsie letscht Johr amnä Septämbermorgä
dä Knüsel wot sini Chuchi entsorgä,
är frogät dä Nico „du häsch doch än Auto Ahänger
mit äm Auto entsorgä das gängt doch viel länger“.
Dä Nico seit „das isch doch klahr,
das ich mit däm Züg id Entsorgig fahr“.
Die Chuchi hauäts churtz und chlie
und ladäd si in Hänger ieh,
dä Teckel zue, s‘lauft alläs glatt
aaghänkt isch, si sind parat.
So fahräts dänn gegä Bänkä zuä
dä Knü und dä Fisch i einärä Ruä,
doch plötzlich stoht dä Fisch uf d’Iesä
dä Knü tuet fascht id Armaturä biesä
är seit zum anderä „was häsch, was isch“?
dänäbet Chriedäwiess dä Fisch,
„jetzt händ mir grad dä Hänger verlohrä“
im Knüsel lüütets scho i dä Ohrä,
är luegt in Spiegel, im würt bangä
gseht dä Ahänger näbt dä Stross im Gebüsch innä hangä.
Fisch zum zweiten
Wänn Du für dä Meischter sötsch ä Chuchi montierä
dän muesch wännt si abholsch äs bitzli studierä,
susch chas dän sie und das wär blöd
äs stoht än zweitä Ahänger döt
fahrsch uf dä Bau und märksch erscht döt
mä gschieder amäl dä richtig Hänger mitnäh söt
anstatt ä neui Chuchi zum werkä
häts nu Abfall im Ahänger mues är dän märkä.
Bäümigi Sach
Gmeind tuet jo und das isch geilä
üs allnä vor dä Fäschttäg än Chrischtbaum verteilä,
„tankä Gmeind, mir schätzäd das sehr“
doch vorigi Bäum häts immer mehr.
Sisch schad das soviel liggä bliebäd
und nochhär bim Anderegg nu umäliggäd,
das freut d’Schaffhuser wo das kännäd
und am Sunntig sofort döt hinderä rännäd.
Doch das Johr händ irs übertriebä
zu all dänä wo sind liggä bliebä,
händ Ihr vo dä Gmeind dän au no bschtellt
40 Nordmanntannä dä Förschter häts gfellt,
doch gholt händ irs nie, si liged no döt
wa das für än Sinn ächt machä söt?????????
Und zum Schluss noch dies:
Willst Du deine Frau go bsuechen,
musst Du sie im Hirschen suechen,
die hockt dort bei Kaffee und Kuechen,
tuet Kamerädli beim Jassen suechen,
du sagst zum Wirt ich möchte versuechen
mini Jasmin ganz schnell go bsuechen
doch der Hirschen Wirt tuet dich verfluechen
do innän hast du nichts zum suechen
susch tuen ich dich grad zämästuechen,
der Ralph tuet noch einer Erklährung suechen
worum dä Beizer so tuet fluechen
und geht dan ohne ein Bier zu versuechen
diheimen wider in d’Stubä uechen.
Autor
Document
Kategorie
Uncategorized
Seitenansichten
10
Dateigröße
81 KB
Tags
1/--Seiten
melden